-
Academia Galega do Audiovisual e as catro deputacións galegas premian, un ano máis, a excelencia na investigación científica no ámbito audiovisual
-
Coa inscrición aberta ata o próximo 3 de maio, os catro traballos gañadores recibirán un galardón e 1.200 euros
A Academia Galega do Audiovisual e as catro deputacións galegas premian, un ano máis, a excelencia na investigación científica no ámbito audiovisual convocando a cuarta edición dos Premios María Luz Morales. Estes galardons de ensaio e videoensaio sobre audiovisual pretenden avivar o interese polos estudos sobre o audiovisual, ofrecendo aos participantes a posibilidade de facer os seus traballos tanto en formato audiovisual como escrito.
Ata o próximo 3 de maio, as persoas interesadas en concursar na presenta edición dos premios poden presentar os seus ensaios escritos e/ou os seus videoensaios sobre temática galega ou internacional a través do correo inscricions@academiagalegadoaudiovisual.gal, segundo recollen as BASES.
María Luz Morales (A Coruña, 1889 – Barcelona 1980)
Os premios levan o nome dunha xornalista galega que foi pioneira na súa época, ao converterse na primeira directora dun xornal diario estatal, e que exerceu como crítica, investigadora e colaboradora de producións audiovisuais. Morales foi tamén un referente na defensa dos dereitos das mulleres e no galeguismo e foi represaliada e apartada da profesión durante o franquismo.
Escritora e xornalista, especializada na crítica de cine e de teatro, dirixiu o xornal La Vanguardia durante a Guerra Civil, sendo a primeira muller na historia de España en ser directora dun diario estatal. Foi activista feminista, republicana e galeguista represaliada polo franquismo, e autora dunha extensa obra literaria. Considerada unha referencia da incorporación da muller a actividade xornalística e intelectual na España do século XX, mantivo a actividade xornalística ata os 91 anos de idade.
Carmela Silva, presidenta da Deputación de Pontevedra, será a anfitrioa da entrega de premios da presente edición. Os catro traballos gañadores recibirán un galardón e 1.200 euros. Os triunfadores da pasada edición foron:
Mellor videoensaio sobre o audiovisual galego: Sara Varela, B Positivos.
– Peza que analiza empregando o Test de Bechdel todas as películas recollidas no catálogo Films from Galicia, estreadas en salas en Galicia dende o 2013 ata o 2018, e aquelas finalistas e gañadoras dos Mestre Mateo dende o 2002.
Mellor videoensaio sobre o audiovisual internacional: Eire García, Propaganda de guerra.
– Traballo que reflexiona sobre a representación da cultura da violación na historia do cine considerando o seu protagonismo na configuración dos imaxinarios colectivos.
Mellor ensaio escrito sobre o audiovisual galego: Pepe Coira, Argumentos de películas.
– Traballo que parte do libro homónimo editado en Vigo en 1931 e que pasou desapercibido para a historiografía do cine galego e español. O xurado definiuno como unha “descoberta” que se atopa a medio camiño entre o ensaio/investigación e a ficción.
Mellor ensaio escrito sobre o audiovisual internacional: Xurxo González, O palco dum povo: Oliveira 2.0.
– Traballo que afonda nun proxecto irrealizado do cineasta Manoel de Oliveira. Abre unha nova perspectiva sobre a importancia do arquivo dixital e a súa relectura.
