-
Gráficas en Negro é un colectivo de deseñadoras unidas por unha mirada feminista sobre a profesión do deseño e está encabezado, entre outras, pola compostelana Uqui Permui
-
Denuncian a complicidade de quen perpetúa, a través da práctica do deseño, un imaxinario colectivo desigual e machista, que permite e xustifica estas violencias e silénciaas
Hoxe 25 de Novembro, co motivo do Día Internacional da Eliminación da Violencia contra a Muller, levaranse a cabo diversas manifestacións ao longo de toda a xeografía galega. Como compañeiras, non puidemos elixir mellor momento para expresar o noso apoio a GRÁFICAS EN NEGRO e colaborar na difusión do seu manifesto.
«O feminismo demostrou que a visualidad, é dicir, as condicións de como vemos e construímos o significado do que vemos, é unha das claves para entender como o xénero se inscribe na cultura occidental. […] Desde a perspectiva feminista, por tanto, as imaxes non soamente narran as relacións de poder senón que sosteñen estas relacións dentro da súa estrutura formal e nas súas condicións de distribución. Iso sábeno todos os deseñadores xa sexan homes ou mulleres, pois son conscientes de que o deseño gráfico ten un papel importante á hora de definir a cultura visual e que eles son, precisamente, quen se encarga de construír ese deseño gráfico».
Raquel Pelta
Gráficas en Negro é un colectivo de deseñadoras unidas por unha mirada feminista sobre a profesión do deseño e está encabezado, entre outras, polas galegas Uqui Permui, Raquel Boo, Rebeca Ces, Natalia Crecente, Irene García, Carolina Núñez e María Ramos. Toman o nome do proxecto En Negro, unha acción social contra as violencias machistas que xurdiu en Santiago de Compostela en 2015. Este proxecto vestiu de loito, de forma simbólica, infinidade de lugares (colexios, tendas, concellos, etc), implicando ao seu paso a colectivos, empresas, institucións e cidadanía contra a violencia de xénero.
«Somos deseñadoras, somos mulleres. Manifestamos a máis absoluta repulsa ante o machismo e a súa consecuencia extrema: os asasinatos. Este ano foron asasinadas 51 mulleres en España (segundo datos oficiais), sen contar as mortes “colaterais” de familiares de vítimas. Pero as formas en que o machismo exerce a súa violencia patriarcal son moi variadas e perséguennos día a día. Para combater esta situación, é preciso recoñecer as graves brechas de xénero existentes en todos os ámbitos, así como atallar as causas estruturais que sustentan estas desigualdades, e isto debe facerse non só a través de políticas reais para a promoción da igualdade e a prevención das violencias, senón tamén desde o ámbito do deseño, xa que este constrúe unha cultura visual colectiva que elixe reforzar ou cuestionar os estereotipos e as estruturas de poder.
Por iso queremos denunciar a complicidade de quen perpetúa, a través da práctica do deseño, un imaxinario colectivo desigual e machista, que permite e xustifica estas violencias e silénciaas. Quen mira cara a outro lado tamén é culpable.
Este 25 de novembro, Día Internacional para a Erradicación da Violencia contra as Mulleres, queremos facer visible o noso compromiso neste sentido, conscientes da nosa responsabilidade social como deseñadoras.»
POR UNHA SOCIEDADE IGUALITARIA XA!
# graficasennegro
# contralasviolenciasmachistas
# igualdadrealya
# EnNegro2019
