Os Premios Martín Códax da Música, que este 2023 cumpren dez anos, acaban de abrir a súa convocatoria a todos os proxectos musicais galegos vixentes e en activo durante o último ano. Desde hoxe 13 de marzo e ata o 2 de abril, a organización dos premios convida a todos os grupos e artistas a participar nesta edición.
Os galardóns integran quince categorías musicais, tres premios Organistrum, un galardón honorífico e, por segundo ano, Mellor Proxecto de Artista Emerxente. O proceso de inscrición de proxectos está aberto a través da web premiosmartincodaxdamusica.gal.
A gala de entrega dos 10º Premios Martín Códax da Música terá lugar o vindeiro 7 de xuño no Pazo da Cultura de Pontevedra. Estará inspirada no proceso de elaboración do viño, en relación aos procesos de composición e produción de música. Será a primeira gala organizada pola directiva entrante o pasado ano en Músicas ao Vivo.
