A TVG abre unha nova vía de produción e colaboración co sector audiovisual galego. Faino a través dunha convocatoria de selección de proxectos dixitais por un valor de 330.000 euros.
Todos eles terán que ser en lingua galega e elixiranse ata 42 proxectos destinados á emisión a través das canles dixitais, páxina web e redes sociais do ente público. As propostas deberán ser contidos de ficción, humor, divulgación, educación, cultura ou infotainment ;en formato longo ou en forma de microespazos/serie.
Doce deberán ser pezas de vídeo cunha duración entre 5 e 50 minutos; e cun orzamento por proxecto non superior aos 20.000 € máis IVE. Os outros trinta deberán estar compostos por un conxunto de pezas de vídeo cunha duración mínima por peza de medio minuto e máxima de 10’. O orzamento de cada proxecto non poderá superar os 3.000 € máis IVE.
A convocatoria da TVG estará aberta ata o 15 de agosto e enmárcase na estratexia de dixitalización, innovación e posicionamento dos medios públicos galegos na contorna dixital e a súa relación co sector audiovisual.
¡Consulta aquí toda INFORMACIÓN SOBRE A CONVOCATORIA!
